Third Post

Hey zämä!
Bi mir isch iz 7 am abe, u mir hei grad znacht gässä, natürlech riis, was schusch... :-) aber hami dra gwönt... u grad i däm moment chunnt grad ä elektriker zur tür ine. natürlech ou ä philipin, u är gset me us wine baschtler. i hoffe mau ä cha üsi heizig flicke, die isch nämlech scho sit längerem kaputt. und sits hie in vancouver iz ou zimlech cheuter isch worde ische zwätter im huus öpe zgliche wie dusse, ussert dases nid inerägnet.. es isch ******chaut u i schlafe mit 3 techine u schlottere immer no weni am morge ufwache. ds isch ämu ä grund zum pünktlech id schu zga.
hüt hani ds nämlech nid gschaftt, wüu mer geschter i usgang si gange, anes chlises konzärtli imene club wo am weekend so überfüllt isch dasme öpe 3 viurtu stund asteit.. ds isch sowiso extrem hie: entweder hets hie in vancouver zwenig bars/clubs oder de hets eifach zviu lüt. wede am fritig oder am samschtig dür downtown loufsch gsesch überau lüt wo aschtö zum inega, o nume wes füre ganz normali bar isch, crazy.. doch znachtläbä isch scho rächt cool hie - einiges me los aus in bärn - näbä downtown wo extrem viu los isch, gitz ono e strass, rächt näch vu üs, wos extrem viu chlini cooli bars het, fasch i jedem gitz am weekend live musig.
Letscht weekend hani mi 2 roommates äntlech richtig us dr wonig chönne bewege: mir si miterer fähri vu downtown nach north vancouver gfare, hei dert när ä böss gno u si ufe huusbärg vu vancouver ufeghiket (Grouse Mountain), doch anstatt 50 min heimer öpe 2 h ka, ungerangerem ou wüu dr eint wo vu panama chunnt natürlech nid so a bärge gwönt isch und zimlech het müesse biisse.. blöderwis hetsech zwätter gänderet wärentdem mir üs eine hei abkrampfet, womer no am fuss vum bärg si gstande het no dsunne gschine, ope 1000 meter witer obe het üs ä chauti näbuwand erwartet und druf abe hets ono afa nisle.. darum simer när zimlech schnäu witer abe (ds mau mit dr gondle. die choschtet nämlech vür abe nume 5 dollar, abe für ufe 35, logik?)
am sunntig bin so richtig go shoppe, zersch hani dürnes inserat ir zitig ä supercoole usverchouf gfunge, irgendwo hinter dr skytrain station inere lagerhaue, het zimlech nach insider usgseh.. uf jede fau hani 2 t-shirts, u hoodie, a gfüettereti jagge und es paar sneakers füre nume 90 dollar becho, da setme natürlech nid nei.. :-)
no am gliche tag hani när äntlech mis lang ersehnte macbook kouft, nach däm ig zimlech problem ha ka bim gäut abhäbä: bir einte maschine chame nume 400 uf einisch abhäbä, und es chömme nume 20 dollar notene use, u mini kreditkarte isch kurzerhand mitemne code versehe worde vur schwyz us, woni ha versuecht 1000 dollar abzhäbä (mini limite..) lol... irgendwie hanis när doch gschafft u ha mitemne kuvert vou 20 dollar notene mis macbook chönne zahle, doch woners de het itippt, isches plötzlech me gsi, hm, tja i ha äbe die blöde taxes vergässä, wo nie ingegriert si in kanada u satti 12 % betrage, ds heisst nomau zumne automat... :-)
doch när hets de klappet u iz bini ämu sitem denn mini windows attidüdene am ablege und mi langsam aber sicher in mac-user afa z entwickle... :-)
iz köri grad es gebrummel uf philipinisch vum chäuer, was hoffentlech bedütet das d heizig iz witer funktioniert, dr "elektriker" isch ämu iz widr gange..
geschter hani übrigens min SIN becho, was so viu bedütet wie Social Insurance Number und öpe zgliche isch wie d AHV ir Schwyz, die bruche zum schaffe weni de nach whistler ga u das isch äbe scho gli (am samschtig inere wuche), drnäbä bini o bi dere organisation gsi wo mir hiuft ä steu z übercho in whistler, es isch ufenart es bewärbigs gschräch gsi, aber uf änglisch... darum bini froh gsi, wone nache 50 min dert widr bi usecho, aber es isch eigentlech ganz guet gloffe!
so das wärs füre momänt! bis gli!
gruess moritz